شہری ہلاکتوںکیخلاف آج مکمل اور ہمہ گیر ہڑتال کی جائے: مشترکہ مزاحمتی قیادت

سرینگر ١٦ ، مئی ؍کے این ایس ؍ مشترکہ مزاحمتی قیادت نے سرکاری فورسز کے ہاتھوں معصوم اور بے گناہ لوگوں کو قتل کرنے کی گھنائونی کارروائیوں کے خلاف آج یعنی 17مئی 2019کو ریاست گیر ہڑتال کرنے کی اپیل کی ہے۔ قائدین نے ائمہ اور خطیب حضرات سے اپیل کرتے ہوئے کہا کہ وہ بھارت کی ان ظالمانہ کاررائیوں کے خلاف بعد نماز جمعہ پرامن احتجاج درج کریں۔کشمیرنیوز سروس (کے این ایس) کو موصولہ بیان کے مطابق مشترکہ مزاحمتی قیادت نے بھارتی افواج اور پولیس فورس کے علاوہ دیگر ایجنسیوں کے ہاتھوں معصوم اور بے گناہ لوگوں کو قتل کرنے کی گھناؤنی کارروائیوں کے خلاف آج 17مئی بروز جمعہ ریاست گیر ہڑتال کے ذریعے ایک پُرامن احتجاج کرنے کی اپیل کی ہے۔ قائدین نے ارشد احمد ڈار پٹن، رئیس احمد ڈار پلوامہ اور نعیم احمد شاہ بھدرواہ جیسے عام شہریوں کو رمضان المبارک کے مقدس مہینے میں فورسز کی طرف سے قتل کرنے کی شرمناک کارروائیوں کی شدید ترین الفاظ میں مذمت کرتے ہوئے کہا کہ بھارت نے ریاست جموں کشمیر کو اپنی جنگی مشقوں کے لیے ایک ایسا میدان کارزار بنادیا ہے جہاں عام لوگوں کو اپنی عزیز جانیں، عزت وقار اور قیمتی جائیدادوں کے حوالے سے عدم تحفظ اور سنگین خوف وحراس میں مبتلا کیا گیا ہے۔ پُرامن عوامی احتجاجی جلوسوں پر براہِ راست نشانہ ساز گولی باری کرکے قتل کرنے کی کھلی چھوٹ دی گئی ہے اور مختلف ایجنسیوں کو ہتھیار فراہم کرکے ایک بدترین قسم کی فرقہ وارانہ نفرت کو بڑھاوا دینے کی مذموم کوششیں کی جارہی ہیں۔ مزاحمتی قیادت نے بھارت کے ان ظالمانہ ہتھکنڈوں کے خلاف نماز جمعہ کے بعدپُرامن احتجاج کرنے کے لیے جملہ ائمہ اور خطیب حضرات سے اپیل کرتے ہوئے کہا کہ ہمیں ان زیادتیوں کے خلاف اپنا صدائے احتجاج بلند کرنے کی ضرورت کو اُجاگر کرنے کے علاوہ بالخصوص نوجوانوں سے پُرامن رہنے کی دردمندانہ اپیل کی ہے ۔