راجوری ٢٧، مئی ؍کے این ایس ؍ خطہ پیر پنچال کے پہاڑی ضلع راجوری میں پولیس وفورسز نے ایک مشترکہ کارروائی کے دوران برلب سڑک نصب کی گئی بارودی سرنگ‘ کو بروقت برآمد کرکے ناکارہ بنا دیاجسکے نتیجے میں ممکنہ جان ومال کے نقصان کاخطرہ ٹل گیا۔
ادھر پولیس نے دعویٰ کرتے ہوئے کہا کہ مذکورہ بارودی سرنگ کو ناکارہ بنانے سے ایک بڑے خطرے کو ٹالا گیا ہے۔ کشمیرنیوز سروس (کے این ایس) کے مطابق خطہ پیر پنچال کے پہاڑی ضلع راجوری میں پولیس و فورسز نے ایک مشترکہ کارروائی کے دوران برلب سڑک نصب کی گئی بارودی سرنگ کو بروقت برآمد کرکے ناکارہ بنادیا۔ پولیس ذرائع نے بتایاکہ یہ IEDیعنی باردوی سرنگ راجوری شاہراہ پر کالرچوک کے نزدیک نصب کی گئی تھی۔
پولیس ترجمان کے مطابق فوج کی ایک ’روڈ اوپننگ پارٹی‘ (آر ائو پی) معمول کی گشت کررہی تھی ،جس دوران سوموار کی صبح گشتی پارٹی نے این ایچ144اے ،جوکہ راجوری کو جموں سے جوڑتی ہے،پرکالر چوک کے نزدیک’ بارودی مواد‘ کاسراغ لگایا۔فوج نے فوری طورپر شاہراہ پر ٹریفک کی نقل وحرکت روک دی گئی جبکہ بم ڈسپوزل اسکارڈ کو طلب کیا گیا۔بم ڈسپوزل اسکارڈ نے بارودی سرنگ کو ناکارہ بنانے کیلئے کارروائی شروع کی اور قریب ایک گھنٹے بعد شاہراہ نصب کی گئی آئی ای ڈی کو ناکارہ بنا دیا گیا۔
پولیس ترجمان نے بتایا کہ ایک بوتل میں مائع جبکہ پالی تھین لفافے میں ٹھوس میٹریل برآمد کی گیا۔ایس ایس پی راجوری یوگل منہاس نے بتایا کہ الرٹ فورسز کی بروقت کارروائی سے ایک بڑا حادثہ رونما ہونے سے ٹل گیا جبکہ معاملے کی نسبت ایک خصوصی تحقیقاتی ٹیم تشکیل دی گئی،جسکی سربراہی ڈی ایس پی ہیڈ کواٹر گوند رتن کریں گے۔
