تیز گیند باز حسن علی اور شاہین آفریدی کی شاندار کارکردگی کی بدولت پاکستان نے جنوبی افریقہ کو دوسرے ٹیسٹ میچ میں 95 رنوں سے شکست دے کر دو میچوں کی سیریز 0-2 سے اپنے نام کر لی۔
پاکستان اور جنوبی افریقہ کے مابین راولپنڈی میں کھیلے جانے والے دوسرے اور آخری ٹیسٹ میچ میں پاکستان نے مہمان جنوبی افریقہ کو 95 رنوں سے شکست دے کر سیریز میں کلین سویپ کر دیا۔
جنوبی افریقہ کے خلاف اس جیت سے پاکستان کو آئی سی سی ٹیسٹ چیمپئن شپ کے تحت 120 پوائنٹس ملے۔
پاکستان نے جنوبی افریقہ کو جیت کے لیے 370 رنز کا ہدف دیا تھا لیکن افریقی ٹیم ہدف حاصل کرنے میں ناکام رہی۔ ایک وقت ایسا محسوس ہورہا تھا کہ جنوبی افریقہ بآسانی یہ میچ جیت جائے گی لیکن ایڈن مارکرم کے آؤٹ ہونے کے بعد ٹیم تاش کے پتوں کی طرح بکھر گئی۔
پاکستان نے چوتھے دن اپنی دوسری اننگز میں 298 رن بناکر جنوبی افریقہ کے سامنے جیت کے لیے 370 رن کا ہدف رکھا تھا۔ جنوبی افریقہ نے ہدف کا تعاقب کرتے ہوئے پانچویں دن ایک وکٹ پر 127رن سے آگے کھیلنا شروع کیا اور 91.4 اوورز میں 274 رنز پر سمٹ گئی۔ سلامی بلے باز ایڈ مارکرم (108 رن) کی شاندار سنچری بھی جنوبی افریقہ کو شکست سے نہیں بچا سکی۔
پاکستان کی جانب سے دائیں ہاتھ کے تیز گیند باز حسن علی نے 16 اوورز میں 60 رنوں کے عوض 5 وکٹ، شاہین آفریدی نے 21 اوورز میں 51 رنز کے عوض 4 وکٹ اور لیگ اسپنر یاسر شاہ نے 23.4 اوورز میں 56 رنز دے کر ایک وکٹ حاصل کی اور ٹیم کی جیت میں اہم کردار ادا کیا۔
یچ کے آخری دن جنوبی افریقہ نے ایک وکٹ پر 127رن سے آگے کھیلنا شروع کیا لیکن ایڈن مارکرم اور ٹمبا باؤما کے علاوہ کوئی بھی بلے باز کریز پر نہیں ٹک سکا۔
مارکرم نے 243 گیندوں میں 13 چوکوں اور 3 چھکوں کی مدد سے 108 رنز بنائے۔ مارکرم 241 رنز کے مجموعی اسکور پر تیسرے بلے باز کے طور پر آؤٹ ہوئے ان کے آؤٹ ہونے کے ساتھ ہی جنوبی افریقہ کی امیدیں بھی ختم ہوگئیں۔
اس کے علاوہ باؤما نے 125 گیندوں میں 6 چوکوں کی مدد سے 61 رنز کی اننگ کھیلی جبکہ رسی وان ڈیر ڈسین نے 97 گیندوں میں 48 رن بنائے۔
مارکرم نے باؤما کے ساتھ چوتھے وکٹ کے لیے 107 رنز کی پارٹنرشپ کی۔ اس شراکت کے وقت جنوبی افریقہ کی ٹیم مقابلے میں نظر آرہی تھی لیکن حسن علی نے جیسے ہی مارکرم کو آؤٹ کیا جنوبی افریقہ کی اننگز کو سمٹنے میں زیادہ وقت نہیں لگا۔
جنوبی افریقہ کی بلے بازی کی حالت کا اندازہ اس بات سے لگایا جا سکتا ہے کہ اس نے آخری 7 وکٹیں 33 رنز جوڑ کر گنوائی جس کے سبب وہ جیتا ہوا میچ ہار گئی۔
اس جیت کے ساتھ پاکستان نے سنہ 2003 کے بعد جنوبی افریقہ کے خلاف پہلی سیریز جیتی ہے۔
حسن علی کو ‘پلیئر آف دی میچ’ کے ایوارڈ سے نوازا گیا جنہوں نے میچ میں مجموعی طور پر 10 وکٹیں حاصل کیں جبکہ محمد رضوان کو پلیئر آف دی سیریز منتخب کیا گیا۔
- میچ کا مختصر اسکور
- پاکستان پہلی اننگ 272 آل آؤٹ
- جنوبی افریقہ پہلی اننگ 201 آؤٹ(پاکستان کو 71 رنز کی برتری)
- پاکستان دوسری اننگ 298 رنز آؤٹ(جنوبی افریقہ کو 370 رنز ہدف)
- جنوبی افریقہ دوسری اننگ 274 رنز آل آؤٹ
پاکستان نے 95 رنوں سے جیت حاصل کی۔
(Courtesy: Etv Bharat)
