بھدرواہ میں شہری کے قتل پر عمر عبداللہ کا اظہارِ برہمی

سرینگر ١٦ ، مئی ؍کے این ایس ؍ نیشنل کانفرنس کے نائب صدر عمر عبداللہ نے بھدوارہ میں فرقہ پرستوں کی جانب سے 50سالہ شہری کو جاں بحق کئے جانے کی کارروائی کی شدید الفاظ میں مذمت کرتے ہوئے ملوث عناصر کو عبرتناک سزا دینے کا مطالبہ کیا۔ کشمیرنیوز سروس (کے این ایس) کے مطابق بھدرواہ میں گورکھشوں کی طرف سے شہری کے قتل کی شدیدالفاظ میں مذمت کرتے ہوئے نیشنل کانفرنس کے نائب صدر عمر عبداللہ نے قتل میں ملوث افراد کیخلاف سخت سے سخت کارروائی کا مطالبہ کیاہے۔ انہوں نے کہا کہ آئین میں کسی کو قانون اپنے ہاتھ میں لینے اور قتل کرنے کی قطعی اجازت نہیں دی گئی ہے۔ اس واقعہ میں ملوث شرپسندوں کو قرارواقعی سزا دی جانی چاہئے۔ عمر عبداللہ نے کہا کہ اگر وقت پر ایسے عناصر کی لگام کسی گئی ہوتی تو شائد آج ایسے واقعات پیش نہیں آتے۔ انہوں نے کہا کہ سابق پی ڈی پی بھاجپا حکومت کے دوران ان عناصر کیخلاف کارروائی کرنے کے بجائے ان کی پشت پناہی کی گئی اور آج حالات یہاں تک پہنچ گئے ہیں کہ یہ عناصر کسی پر گولی چلانے سے بھی کتراتے نہیں ہیں۔ این سی نائب صدر نے کہا کہ اگرچہ وزیر اعظم نریندر مودی نے ایسے واقعات روکنے کی بات کی لیکن زمینی سطحی پر اس کا عملدرآمد کرنے سے اجتناب کیا گیا۔ انہوں نے کہا کہ اس واقعے میں ملوث افراد کو عبرتناک سزا دی جانی چاہئے تاکہ یہ بات یقینی بن جائے کہ مستقبل میں ایسے واقعات پیش نہ آئے۔اس موقعے پر این سی نائب صدر نے بھدواہ کے عوام سے امن و امان اور بھائی چارے کو بنائے رکھنے کی اپیل کی۔