ذرائع کے مطابق افغان صدارتی محل میں نئی عبوری حکومت کے سربراہ کے طور پر علی احمد جلالی کے ساتھ طالبان کو اقتدار منتقل کرنے کے لیے مذاکرات جاری ہیں۔
خامہ پریس نیوز ایجنسی کے مطابق قومی مصالحت کی اعلیٰ کونسل کے سربراہ عبداللہ عبداللہ اس میں ثالثی کا کردار ادا کررہے ہیں۔
ذرائع نے یہ بھی کہا کہ علی احمد جلالی کو نئی عبوری حکومت کا سربراہ مقرر کیا جاسکتا ہے۔
دریں اثنا قائم مقام وزیر برائے داخلہ اور خارجہ امور عبدالستار مرزکول نے ویڈیو کلپس میں یقین دلایا کہ کابل کے لوگوں کا تحفظ یقینی بنایا جائے گا کیونکہ وہ بین الاقوامی اتحادیوں کے ساتھ مل کر شہر کی حفاظت کررہے ہیں۔
مِرزکول نے کہا کہ کابل پر حملہ نہیں کیا جائے گا اور یہ کہ منتقلی پرامن طریقے سے ہوگی۔ انہوں نے کابل کے باشندوں کو یقین دلایا کہ سکیورٹی فورسز شہر کی حفاظت کو یقینی بنائیں گی۔
خامہ پریس نیوز کے مطابق اس سے قبل طالبان نے ایک بیان میں کابُل کے باشندوں کو یقین دہانی کرائی تھی کہ وہ خوفزدہ نہ ہوں کیونکہ ان کا ارادہ فوجی دارالحکومت میں داخل ہونے کا نہیں ہے بلکہ کابُل کی طرف ایک پرامن تحریک ہوگی۔
ٹولو نیوز کے مطابق ‘طالبان نے اب اپنے ارکان کو کابل کے دروازوں کے قریب انتظار کرنے اور شہر میں داخل ہونے کی کوشش نہ کرنے کا حکم دیا ہے۔
دریں اثنا روس، افغانستان کے مسئلے پر اقوام متحدہ کی سلامتی کونسل کا ہنگامی اجلاس بُلانے پر کام کررہا ہے۔
